Areguard la purschida offrescha Vero atgnamain exact il medem sco Facebook ed instagram. Ins po parter cuntegns ils pli differents cun ses amis. Quai po esser fotografias, videos, chanzuns, cudeschs u films. E sco tar las bleras applicaziun da social media, pon ins er scriver messadis via chat direct.
Vero attira però l'attenziun cun auters avantatgs: L'applicaziun duai far fin a reclama ed algoritems che decidan la successiun dals cuntegns sin la pagina principala. Reclama na datti nagina e mintga «post» duai avair la medema prioritad. Vul dir ch'ils cuntegns vegnan ordinads a moda cronologica.
Basegn ed agid dad «influencers»
E questa filosofia, da betg vulair influenzar il consument, ni tras reclama, ni tras plazzar cuntegns, para d'esser tschertgada. Pertge blers han tenor l'expert da social media Jürg Kobel avunda d'applicaziuns che vulan diriger il consument. I dettia adina pli pauc il basegn d'ina applicaziun neutrala. Perquai è l'applicaziun vegnida chargiada giu fitg savens las ultimas emnas.
Sia andetga popularitad ha l'applicaziun però cunzunt d'engraziar a quai che «influencers», damai persunas ch'han ininfluenza sin las raits socialas, han fatg reclama per Vero. Dar datti l'applicaziun numnadamain gia dapi il 2015.
Success mo a curta vista?
Populara è l'applicaziun damai daventada las davosas emnas. Ussa vali dentant da sa cumprovar. E quai pudess tenor l'expert vegnir grev. Ils ultims onns haja quai dà pliras applicaziuns ch'hajan gì in success andetg ed hajan lura però mo pudì sa cumprovar tar tschertas gruppas e betg tar la gronda massa.
Plinavant cumbatta Vero per il mument er cun problems tecnics, cun quai ch'els n'eran betg preparads per il success andetg. Er quai sto vegnir eliminà per che l'applicaziun possia avair success a lunga vista. Ed er il success da pajar vegn betg ad esser in factur nunimpurtant: Per l'emprim milliun utilisaders vegn l'applicaziun ad esser gratuita. Suenter sto Vero però introducir in sistem da pajament per segirar ina funtauna d'entradas, cun quai ch'ins ha naginas entradas da reclama. Co che quel vegn a funcziunar n'han ins però anc betg decidì.
