Puspè inditgeschan tut ils chalenders rumantschs il medem num per ils 3 da favrer che n'ha nagin connex cun Placi.
Plasch è la furma rumantscha da Blasius, il medi tirc dal 4. tschientaner suenter Cristus ch'era daventà uvestg, ma ha stuì laschar la vita sco martir. El è il sontg che po curar dal mal la gula, ed enfin oz datti la benedicziun da s. Plasch che vegn fatga cun duas chandailas. Cun quellas vegn el era represchentà, perquai ch'el aveva gidà da dar enavos ad ina dunna attempada ses portg ch'il luf aveva rapinà, e la dunna al aveva lura regalà las chandailas.
