L'um ch'è naschì en la regiun da l'Italia dal Sid ha fatg ina carriera academica sco or dal cudesch. È tranter auter stà a universitads da Cambridge e Yale. È actualmain professer a l'universitad a Roma sco er a Firenza. En chaussas politicas è el dentant in newcomer. Conte n'è mai stà en il parlament, el tutga dentant dapi intgins onns tar il moviment da «Cinque Stelle».
Marionetta dals schefs da partida
Sco diversas medias scrivan pudess Giuseppe Conte dentant mo esser ina soluziun transitorica. Ditg han ils dus presidents da las duas partidas da coaliziun Matteo Salvini e Luigi di Maio sa scagnà tgi che duai daventar primminister. La dumonda è uss tge influenza ch'els dus vegnan a prender sin Conte prendì il cas ch'el survegn dal president da l'Italia l'incumbensa da furmar la regenza.