Per incumbensa da la FIFA controllescha l'EMPA dapi 22 onns las ballas dals turniers da ballape. Las ballas ston passar ina seria da tests severs. La balla «Telstar 18» satisfa a tut ils criteris, communitgescha l'institut federal da controlla da material e da perscrutaziun.
«Telstar 18» è tenor la firma Adidas ina balla da hightec cun ses chip integrà ed era ina balla da tradiziun. Cun il design da retro-look regorda ella a l'emprima balla da la firma per in campiunadi mundial da ballape, quel dal 1970 en il Mexico.
