Al Tavulin litterar sa scuntran questa giada Clà Riatsch, anteriur professer da litteratura rumantscha a l'universitad da Turitg, e l'istoricher e romanist Martin Camenisch.
«Reise ans Ende der Welt» da Pascal Beer e «Der letzte Schnee dad Arno Camenisch, quai èn ils dus cudeschs sin il Tavulin litterar che polariseschan questa giada pulit. Ils dus auturs cun la medema annada han passentà onns da lur uffanza en in pitschen vitg en Surselva.
«Der letzte Schnee» è il titel da la pli nova publicaziun dal shootingstar Arno Camenisch. En il center da l'istorgia stattan dus umens che lavuran tar in runal da skis ch'ha gia vis megliers temps cun dapli naiv. Ils dus spetgan ils skiunzs e filosofeschan davart chaussas che na turnan mai pli.
En il roman da Pascal Beer vai per il giuven Nils ch'ha gia en l'emprima classa difficultads cun scriver bel. Pli tard na lascha la litteratura betg liber el ed el fa in viadi bunamain neurotic per scuvrir tge ch'è in vair scrivent.
