En scola sez però, era tut memia stretg e stinà per ella. «Jau hai fatg il vadè», uschè ferm, fin ch'ella è vegnida bittada or da la scola, or dal sistem. «Quai è er ina sort scola», guarda ella enavos oz sin quels dis muventads.
Dapi sis onns viva ella a New York. Là ha Lara Glisenti frequentà la scola d'acturas la pli enconuschenta dal mund «The Lee Strasberg Conservatory». Ma er en il mund da teater n'è ella betg pronta da far cumpromiss, «jau na fatsch betg reclama per in product che na ma persvada betg». Tge cha quai vul dir per sia carriera sco actura e pertge che sia statura è adina puspè in tema, udis en quest Profil.
A New York ha ella chattà sia grond'amur e ses nov dachasa ad East Harlem. Là è ella la princessa dal bloc e cun ses um afroamerican è ella sfundrada en l'autra America, en la Black culture cun sia bellezza, musica, istorgia, e las difficultads en il mintgadi. «La colonisaziun cuntinuescha fin il di dad oz, e quai fa mal.»