Julius Fu?ík, aschia sa numna il cumponist tschec che ha scrit quella ovra musicala. El ha studegià al conservatori a Prag ed è ì tar ils cumponists renumads Antonin Dvorak e Josef Franz Wagner a scola. Suenter sia scola è el lura daventà dirigent d'in orchester militar en l'armada austriaca – ungaraisa. L'ovra ha il cumponist tschec lura scrit l'onn 1899. Concepì era quest marsch sco marsch da triumf.
Il svilup dil marsch
Oriundamain ha l'entrada dals gladiaturs anc gì in auter num, numnadamain Grande Marche Chromatique. Cunquai che Julius Fu?ík è stà grond amant dal roman Quo vadis, nua ch'i va per gladiaturs, è el lura sa decidì da midar il num sin l'entrada dals gladiaturs per ludar l'autur.
Da l'armada en il circus
L'onn 1901 ha lura il cumponist canadais Louis-Philippe Laurendeau prendì il marsch ed ha fatg tschertas adattaziuns vid la melodia. Tranter auter ha el fatg ella pli svelta e midà la tonalitad. Davent da là è la musica daventada pli renumada. Silsuenter è la musica vegnida pli populara en ils circus nordamericans e suenter era en ils circus europeics.
