En il Chalender Ladin pon ins leger oz il num Malgiaretta. Per casualitad ha in'auditura, ch'è oriunda da la Val Müstair, dumandà la derivanza da quest num che po esser prenum u schlattaina.
Gia dapi il 1432 è documentada la schlattaina a Müstair. Ma era a Vaz, Sumvitg e Trun datti gia da quel temp exempels che derivan tuts dal num da la sontga Margaretha. Ella è stada sper Maria e Katharina in dals pli frequents nums da dunna, probablamain perquai che ses destin da martira è vegnì descrit en la Legenda Aurea dal 13avel tschientaner.
Quest num feminin che n'ha betg in correspundent masculin exista en multifaras variantas sco Deta, Gretta, Greicla e Meta. E tgi n'enconuscha betg la sontga Margriata?