Atgnamain ha tut cumenzà cun dus producents da musica. Els han vulì far reclama e ramassar raps per pudair realisar in studio. Sco emprim han els mo vulì organisar in concert. Suenter pliras sesidas s'ha dentant mussà ch'i vegn a dar in festival pli grond.
400'000 persunas han visità il festival. Tuttina han ils organisaturs fatg in deficit da 1,8 milliuns dollars. Quai surtut perquai che mo paucs han cumprà in bigliet. Tenor ina documentaziun da la BBC èn ils emprims aspectaturs arrivads schon duas emnas avant. Là n'èra la cassa anc betg stada construida. L'emprim di dal festival èn 150'000 persunas stadas al lieu – la cassa n'èra anc adina betg stada construida. Ils organisaturs han badà ch'els na pon betg pli far bler ed han declerà ch'il festival na custa pli nagut.
