Johnny Cash: «It was Jesus»

Quests dis preschenta il Radio Rumantsch pliras emissiuns e contribuziuns che tractan ils 500 onns refurmaziun.
Er nossa chanzun e si'istorgia dad oz sa fatschentan cun il tema religiun, e chanzuns da quel gener datti bleras en la musica da pop e rock. En ils Stadis Unids è quai schizunt in agen gener da musica, ed il «christian rock» sa venda bain. La chanzun dad oz è però ina pli veglia, ina che va profund, dad in che aveva ina relaziun fitg stretga ed intensiva cun la religiun: da Johnny Cash. Dad el datti 80 albums, e 10 da quels èn discs cun chanzuns da gospel, chanzuns religiusas. Per Cash ina chaussa impurtanta: el era fitg crettaivel, in baptist sco blers en il sid dals Stadis Unids – però el sa veseva er sco putgant e flaivel. Cash avess gugent fatg chanzuns cun cuntegn spiritual e religius, però tar Sun Records n'era quai betg pussaivel. Perquai ha el bandunà il label ed ha suttascrit in contract tar Columbia, ch'aveva empermess da far cun el er discs da gospel. Ses emprim ha el registra gia il 1959: «Hymns by Johnny Cash», in disc che cuntegn be chanzuns religiusas. L'emprin toc «It was Jesus» è sco ina pregia che raquinta l'istorgia da Gesu che cumpara tar las raspadas e che consolescha ils senza-speranza e guarescha ils malsauns e che vegn mess a la fin vid la crusch. Il messadi religius da Cash cumpara sco chanzun moderna per quella giada, cun ses stil tut agen – e quai è be ina da bleras cun quel tema.