La raschun n'è betg ch'ins viandescha pli svelt en il Grischun, mabain che blers dals mussavias en il Grischun èn anc ord in temp, nua ch'il temp da viandar vegniva anc mesirà auter. In temp nua ch'ins prendeva anc la media che diversas persunas avevan da viagiar il tschancun inditgà – quai da persunas giuvnas fin attempadas. Fin ils onns 1980 è quai stà il standard che vegniva duvrà per inditgà il temp da viandar sin ils mussavias mellens.
Furmla matematica sco nov standard
Dapi il 2006 vala dentant il nov standard che vegn quintà cun ina furmla matematica, sco Michael Roschi, il mainafatschenta da l'Uniun Sendas Svizras ha ditg al magazin da consuments Espresso da SRF. Grazia a quella furmla sviluppada en ils onns 1980 d'in collavuratur da l'uffizi federal per la topografia naziunala e ses figl, èn las indicaziuns sin ils novs mussavias mellens pli pauc generusas che sin ils mussavias vegls ch'ins chatta anc per part en il Grischun. Qua eran quels anc pli robusts e tegnan perquai era pli ditg, uschia Michael Roschi.
Viandant normal va 4,2 km/h
Da principi funcziuna la furmla dentant uschia: ins va da quai anor ch'in normal viandant chamina cun 4.2 km/h a dretg ora. Lura miran ins sin la carta con lungs ch'il tschancun è e quant fitg ch'i va ensi ed engiu ed uschia pon ins lura quintar ora il temps ch'ins dovra per viandar. Tge che na vegn dentant er betg resguardà qua è la topografia da las sendas, pia sch'ina senda è pli greva dad ir pervia dal terren e dovra uschia dapli temp.
Naginas pausas
Dentant era cun ils novs mussavias na vul quai betg dir ch'ins ha lura exact il temps ch'è inditgà. Pertgè i dependa tenor Michael Roschi natiralmain era fitg, quant fits ch'ins è. Pausas n'èn en mintga cas mai quintadas en tar il temp inditgà sin ils mussavias.
