Kate Yanai: «Summer Dreaming»

Ses bab è producent da musica a Los Angeles e Kate lavura en emprima lingia sco chantadura en il studio ed accumpogna auters interprets sin lur turneas. Il 1988 ha ella accumpagnà France Gall per ina seria da concerts en Frantscha, e durant in di liber ha ella chantà en in studio ina curta chanzun ch'è vegnida duvrada per ina reclama per Bacardi. Quella melodia è daventada fitg enconuschenta e trais onns pli tard ha Kate Markovitz registrà l'entira chanzun. Ses num d'artista era uss Kate Yanai e la chanzun ha survegnì il titel «Summer Dreaming», ina chanzunetta che derasa atmosfera da vacanzas, cun tuns e ritmus caribics. La stad dal 1991 è quai stà in grond success en Svirza, Austria e Germania, però l'emprim ed er l'ultim hit per Kate Yanai. Uss lavura ella puspè sco chantadura d'accumpagnament, per Randy Newman, Billy Joel e James Taylor.