Elizabeth Main (1861 – 1934) e Christian Klucker (1853 – 1928) n'èn pli probabel mai s'inscuntrads. Era sch'i fiss stà fitg bain pussibel.
Ella, ina nobla Englaisa, ha fatg ina carriera sco alpinista senza congual. Cun rassa e zappunet da glatsch ha ella cuntanschì ils pizs ils pli auts en l'Europa – e quai sco dunna cunter tut las convenziuns. En il satgados aveva ella adina cun ella l'apparat da fotografar.
El, in Engiadinais da Fex, vala fin al di dad oz sco in dals megliers guids da muntogna ch'i ha dà en Svizra – ina icona tranter ils guids da muntogna. El ha guidà ils pli enconuschents alpinists da quel temp, Ludwig Norman-Neruda u Edward Whymper.
Quai ch'Elizabeth Main e Christian Klucker han communabel è in spiert d'aventuriers, in caracter da rebels ed ina passiun senza cunfins per las muntognas. Ella era «be» ina dunna, el «be» in guid da muntogna. Tuttina han tuts dus scrit in'autobiografia – las funtaunas per questa Marella.
(Repetiziun dal 2013)
