Frank Sinatra, naschì als 12 da december 1915 e mort ils 14 da matg dal 1998, è stà actur, producent ed in dals musicists ils pli impurtants da tut ils temps. Durant ils onns 40 e 50 ha el registrà tschients da chanzuns e bleras da quellas èn daventadas semperverdas. La carriera da Sinatra ha er gì auts e bass cun fasas da pauc success, però mintga giada ha el chattà la storta per lantschar in return – uschia er il 1966. Dapi 11 onns n'aveva el gì nagin hit numer 1. Qua survegn el l'occasiun da chantar in toc ch'era vegnì da l'Europa.
In tschert Ivo Robic da la Croazia aveva dà quel a Bert Kaempfert che ha lura fatg la versiun definitiva. Sinatra è stà da l'avis che quai saja ina paupra chanzun, l'ha pero listess registrada en ses stil unic – e «Strangers in the night» è daventà ses pli grond hit, in nr. 1 en America e Gronda Bretagna ed el ha survegnì 4 Grammys. Per Sinatra è quai stà il penultim grond hit, pertge quels onns han lura ils Beatles, ils Stones ed autras gruppas da pop e rock surpiglià il timun.
