Cun la app Vivino san ins ir en butia e semplamain fotografar l'etichetta d'ina buttiglia vin e survegn ina valitaziun da quest vin. La app funcziunescha er en restaurants, nua ch'ins sa scannar la carta da vin e survegn per mintga vin ina valitaziun. E sco tiarza pussaivladad, san ins era duvrar la app per arcunar ils vins ch'ins vuless puspè baiver ina giada en ina glista persunala.
Valitaziun cun stailas
Tar las valitaziuns dals vins na sa tracti betg da valitaziuns dad experts. Ils passa 24 milliuns utilisaders valiteschan ils vins gist sez cun in sistem da 5 stailas. In vin en media survegn cun questa valitaziun 3,6 stailas. Ina valitaziun cun quatter stailas vul per exempel dir, ch'il vin è megliers che 85% da tut ils vins. Vins cun ina valitaziun da 4,5 e dapli stailas èn fitg rars ed extraordinaris.
