I na capita betg savens che chanzuns en linguas exoticas daventan popularas er tar nus. In bel exempel udis oz. Ina chanzun en ina lingua che sa numna «Tagalog».
Freddie Aguilar, in giuven da las Filippinas, banduna sia famiglia cun 18 e viagia tras il mund, be cun sia ghitarra. El vegn sin faussas vias e cumenza a giugar per raps, realisescha però ses sbagl e turna a chasa. Per che ses geniturs perdunan ad el, scriva el ina chanzun cun la tematica «valurs da famiglia», ina chanzun che muventa surtut ses bab. Cun la chanzun fitg persunala «Anak» - che vul dir «uffant» - fa el lura carriera. Aguilar cuntanscha il 1977 il final da la concurrenza MetroPop a Manila – e plaunet sa derasa sia chanzun sin tut il mund, malgrà ubain gist pervi da sia gronda melanconia e sia lingua exotica. Freddie Aguilar dovra numnadamain sia lingua Tagalog, la lingua la pli impurtanta da las Filippinas. Pli tard vegn la chanzun «Anak» publitgada en 56 pajais, i dat versiuns en 36 linguas ed ella è vegnida vendida 30 milliuns giadas.
