Amez ils onns 60 era Bob Dylan il 'Messias' da la musica da folk, il poet ch'aveva revoluziunà la musica da quest temp. Las chanzuns da Dylan n'èn però mai stadas gronds hits commerzials. Enfin ch'ina gruppa da Los Angeles cun Roger McGuinn, Gene Clark, David Crosby, Chris Hillman e Michael Clarke ha survegnì il 1964 ina registraziun d'ina chanzun da Dylan ch'era pronta per cumparair sin ses 5avel disc «Bringing It All Back Home».
El era quella giada anc plainamain sin la via dal chantautur cun ghitarra acustica – ils Byrds avevan però gia fatg experientschas cun il folk rock electrifitgà ed els han registrà lur versiun da «Mr. Tambourine Man». Quai è daventà in success nunspetgà. Lur emprima single è stada in hit nr. 1 en America ed en Engalterra. Ed er l'unica chanzun da Dylan ch‘è rivada sin in'emprima posiziun d'ina parada da hits. Anc pli impurtant è però stà il fatg che quella chanzun ha fatg via per ina fasa fitg creativa dal folk rock che ha enritgì enormamain la musica da la fin dals onns 60.
