«Exodus» è il 9avel disc da Bob Marley. Quai è er ses pli impurtant, e cun quel ha el gì success commercial sin tut il mund. Per registrar quest disc va Bob Marley a Londra, la situaziun politica a Jamaica è malsegira e paucs mais avant avevi dà in'emprova d'assassinar il star dal reggae. Il disc resplenda l'engaschament politic e social da Marley e surtut la chanzun «Exodus» è ina proclamaziun.
Jamaica cun sia gronda populaziun cun ragischs africanas aveva quella giada in moviment fitg popular. Ils rastafaris, che sa referevan sin l'imperatur Haile Selassie da l'Etiopia, eran da l'avis ch'els stoppian returnar en Africa, quasi in exodus biblic en lur terra sontga, e che Jamaica saja lur «Babylon», lur lieu d'exil sfurzà. Perquai è la frasa «Exodus, movement of Jah people» il messadi central che vegn repetì bleras giadas en quella chanzun da 7 minutas e 40 secundas.
