Sauts novs da furmaziuns da tut la Svizra

Adina puspè datti discs novs da chapellas che han registrà lur sauts, er en temps nua che bler capita sin via digitala. L'ultim temp avain nus survegnì novitads dal Schwyzerörgeli-Trio Balmhorn, da la chapella Huusfraue-Gruess, dal quartet appenzellais Altfrentsch e dal Echo vom Ürnerländli. Quai è la chapella da las soras Angela e Julia Gisler e Marianne Epp-Ziegler. In auter disc nov vegn dal Ländlerquintett Berna-Grischa, ina chapella bernaisa che fa musica populara en stil grischun. In disc cun pliras chapellas porta il titel «70 Jahre Mosi-Wysel». Quai è Alois Lüönd, in musicant original dal chantun Sviz ed el suna cun diversas chapellas da sias cumposiziuns e ses sauts preferids.