730 kg rument producescha mintg'abitant en Svizra onn per onn. Sche l'entira populaziun mundiala sa cumportass sco nus en chaussa consum e rument, lura na tanschessan las resursas da noss planet betg pli: nus consumain sco sche nus avessan a disposiziun trais planets.
Blers èn conscients da quai e vulan far insatge encunter. In dals moviments che cuntanscha zic a zic era la Svizra è l'uschenumnà Zero Waste (qvd. «nagin rument» u «nagin sfarlattim»).
Èsi utopic da vulair ozendi empruvar da viver senza producir rument? U èsi realisabel era en il mintgadi?
La Marella dat in sguard en il tegnairchasa dad Angela Catschegn-Hosig che viva dapi questa stad tenor las ideas dal Zero Waste.