«Roxy Music» era ina band che fascheva rock progressiv, pli tard lura er cun tuns dal «Glam Rock» e «New Wave» en in stil fitg cool. Ses musicists èn daventads iconas da quel temp: Brian Eno, Phil Manzanera, Andy Mackay e surtut il chantadur Bryan Ferry. El sa preschentava sco «Dandy» ed um galant cun vestgi e cravatta ed era er savens responsabel per las cumposizuns da la band.
Il 1979 cumpara «Dance away» sin lur disc «Manifesto». Oriundamain era quai in toc per in dals discs solo da Ferry, pero a la fin ha el gì avunda auters buns tocs. Cun sia band, quella giada già senza Brian Eno, ha el fatg ina chanzun cun ina expressiun enorm estetica e plain stil, ed en quels temps dal punk e new wave è quella stada ina staila solitara al tschiel da la musica brittanica.
