Per noss chors po quest disc esser in'inspiraziun ed ina funtauna per emprender e forsa era registrar novas chanzuns. I duess dentant era mussar a chors internaziunals il stgazi musical svizzer. Quai cun chanzuns en tuttas linguas naziunalas sco era per englais e latin. E quai cun melodias da cumponistas e cumponists svizzers.
Il chor da giuvenils svizzer e lur dirigent Nicolas Fink han registrà 28 chanzuns. Cun quai porschan els in sustegn tar il cudesch da notas ch'è cumparì ensemen cun il disc en la chasa editura Carus.
Per quest'emissiun avain nus discurrì cun il dirigent Patrick Secchiari. El è stà ina da las persunas ch'han tschernì las chanzuns per il project «Swiss Choral Music».
Patrick Secchiari è in dirigent da chors cun var 20 onns experientscha. Actualmain dirigia el ils chors da chombra da Seftigen e Glaruna sco er in'agen ensemble vocal cun il num «ardent» ed il Teamchor Jona. Ultra da quai s'engascha il dirigent bernais era en la scolaziun. Tranter auter dat el instrucziun da diriger a la scola auta dals arts da Berna ed è responsabel per la scolaziun d'experts ed expertas per l'Uniun svizra da chant «SCV».
Ensemen cun il dirigent Johannes Meister è el l'editur dal carnet e dal disc cumpact ed ha tschernì las chanzuns per il disc «Swiss Choral Music».
La schelta na saja betg stada simpla, ha Patrick Secchiari tradì. Igl è dentant era stà in pensum ambizius ch'ils editurs han imponì a sasez. Arranschar in disc che cuntegna tuttas linguas naziunalas, cun cumponists e cumponistas da l'entir pajais e lura er anc musica da chors pli nova. Cun il disc «Swiss Choral Music» è quai dentant gartegià stupent. I cuntegna era chanzuns en differents grads da difficultad uschia che blers chors naziunals ed internaziunals pon piclar or il meglier adattà per lur chantaduras e chantadurs.
