Dal 1970 èsi stà a fin cun ils Beatles, e mintgin dals «Fab Four» ha fatg ses agens discs. Anc quel onn, ils 11 da december è cumparì l'emprim disc solo da John Lennon «John Lennon/Plastic Ono Band» cun accumpagnament da Ringo Starr a la battaria e da Klaus Voorman al bass. La chanzun la pli impurtanta è daventà «Working Class Hero», ina da quellas che mussan ses engaschament per pasch ed egualitad, sco tar: «Give Peace a chance» ed «Imagine».
Lennon sez vegniva da la classa d'amez e n'enconuscheva betg la vita dals lavurers, perquai er las discussiuns ch'i ha dà suenter pervia da l'autenticitad. El chanta da la vita d'insatgi che crescha si en la classa da lavurers, da si'uffanza e tut quai ch'el sto far tras per daventar a la fin in che fa carriera en nossa societad: As soon as you're born they make you feel small.
La chanzun ha chattà blers fans, e blers musicists han fatg lur versiuns, sco Green Day, ils Manic Streets Preachers, Marylin Manson e schizunt David Bowie. I ha però er dà cuntroversas, surtut en ils Stadis Unids, sco savens be pervi d'in unic pled en il text. I va per la frasa: «'Til you're so fucking crazy you can't follow their rules». In politicher ha udì la chanzun, ha fatg ina accusaziun per metter quella sin la glista naira – e gronda reclama per John Lennon. A la fin èn las pretensiuns vegnidas refusadas.
