Francesco de Gregori: «Viva l’Italia»

L'october da l'onn 1979. Il chantautur Francesco de Gregori preschenta ses 7avel disc «Viva l'Italia». La chanzun cun il medem titel daventa in grond semperverd, ed ina chanzun che blers interpreteschan tut auter sco ses autur. «Viva l'Italia» è in toc ambivalent, in imni che na descriva betg las varts suleglivas ed agreablas, «l'Italia del valzer», «l'Italia del caffè». De Gregori mussa er ils defects: «l'Italia derubata e colpita al cuore», il pajais che vegn ruinà da la politica e da la corrupziun. Sia chanzun dal 1979 è anc adina actuala, pli che mai. De Gregori è pero in grond chantautur e poet. Perquai chanta el er da «l'Italia che non ha paura, da l'Italia che resiste».