Ins po segirar tut las fotografias, ils films, apps ed autras chaussas sin il telefonin:
- Sin il computer
Via cabel u rait da WLAN pon ins sincronisar il telefonin via computer ed uschia copiar vi tut las datas giavischadas. - Local sin il telefonin
Cun apps spezialisadas pon ins era arcunar las datas che stattan a cor direct sin il telefonin. Cun quel backup pon ins lura puspè reconstruir tuttas fotografias ch'ins ha stizzà senza vulair. Ma: Sche l'apparat va a perder u va en paglia na gida quai betg bler.
- En la cloud
I dat nundumbraivels servetschs dad arcunar online, nua ch'ins po cun las apps correspundentas era far backups en la cloud.
Telefonins dad Android ed iPhones han gia drizzà en ina funcziun da segirar las datas. Tgi che n'ha anc betg activà quellas cun drizzar il nov telefonin po far quai en las «Einstellungen». - Android: En il menu selecziunar «Sichern & zurücksetzen» e lura activar la funcziun. Endatar num d'utilisader e pled-clav dal Google Drive ed activar, tge che duai vegnr segirà en la cloud.
In conto da Google Drive fan ins per regla gia, cura ch'ins drizza en il telefonin. - iPhone: En la survista smatgar sin l'agen num e lura ir sin «iCloud» ed activar quella. Lura fissi be anc da selecziunar, tge datas che duain vegnir segirads en la iCloud.
Per surprender las datas segiradas sin in nov telefonin pon ins cun drizzar en quel s'annunziar tar il servetsch correspundent e lura vegnan quellas sincronisadas cun il smartphone. Uschia stuessan las fotografias, ils contacts ed ils filmins vegnir copiads sin il telefonin.
