Sia vusch gruglia enconuschan tuts be subit, quella da John Robert Cocker, naschì il 1944 e mort ils 22 da december dal 2014. Sias interpretaziuns da tocs enconuschents èn nunemblidaivlas. Joe Cocker ha chantà tocs sco «With A Little Help From My Friends» ubain «Could You Be Loved» ina tempra tut speciala. Quai ha el era fatg il 1987 cun «Unchain My Heart», in toc vegl ch'era stà l'onn 1961 in hit per Ray Charles. Davos tut quest success datti pero in'istorgia tragica.
Il cumponist Bobby Sharp era dependent da drogas, ed el ha vendì en sia miseria sia cumposiziun per 50 dollars ad in Teddy Powell. E quel ha lura fatg in grond affar. Pli tard è Bobby Sharp pero ì avant dretgira ed ha survegni enavos ils dretgs per sia cumposiziun. Sper Joe Cocker han era Bob Dylan ed Eric Clapton interpretà questa chanzun.
