La Canorta Tgimorola per uffants dal Surses duess vegnir averta sco previs l'emprim da matg 2015. Ins saja sin buna via e las lavurs preparativas marschan tenor plan, ha ditg Monika Battaglia, la responsabla per la canorta a Savognin e suprastanta da la suprastanza da l'Uniun KIBE Laibella.
Enfin ussa hajan'ins tschintg uffants che sajan gia annunziads per la canorta d'uffants a Savognin, ha ditg Monika Battaglia. Ins saja cuntent cun quest dumber e per tut ils lavurdis da l'emna haja quai anc plaz per ulteriurs uffants, ha ella ditg plinavant. Sonda, ils set da mars datti in di da rimnada: La canorta d'uffants rimna rauba da tutta sort per la canorta, sco per exempel tramagls e vestgadira. La canorta d'uffants Tgimirola a Savognin è ina filiala da la KIBE Laibella, che maina gia plirs onns ina canorta d'uffants a Lai.
