The Crusaders & Randy Crawford: «Street Life»

L'onn 1979: la musica da disco ha conquista las paradas da hits e dapertut datti chanzuns cun blers tuns d'orchester, da trumbettas, posaunas e violinas. Quella giada ha er in band da jazz success cun surprender in pau da quel ritmus e da quels tuns. Ils «Crusaders» èn ina band da jazz e funk da Los Angeles, ina furmaziun cun muscists da vaglia. Commembers èn il saxofonist Wilton Felder, il posaunist Wayne Henderson, il batterist Stix Hooper ed il pianist Joe Sample. Els han gia realisa sur 20 discs, pero il 1979, durant il temp da disco, han els in grond hit. Sin lur album «Street Life» datti ina chanzun cun il medem titel, in toc cumponì da Joe Sample. Cun ir culs skis a Mammoth Mountain in California vesa el a blers principiants ch'han fadia da star sin lur skis, ina situaziun in pau strana, sco sin ina via cun bler chaos. Joe Sample scriva ina melodia che va spert en l'ureglia. In toc da jazz e funk cun elements da la musica da disco. El ha pero anc in'autra idea, e quella procura che la chanzun daventa propi enconuschenta. Ils Crusaders engaschan a Randy Crawford, in chantadura cun ina vusch da bellezza, e grazia ad ella daventa quai il toc il pli enconuschent dals Crusaders.