Siglir tar il cuntegn

Header

audio
Keystone
laschar ir. Durada: 4 minutas 49 Secundas.
cuntegn

In cabel per tut ils telefonins

Enconuschais questa situaziun: Vus essan en gir, l'accu da noss telefonin è vid e la tschertga d'in cabel cumenza. Tge cabel has ti? Quel dad Apple? Quel dad Android?Bainbaud duain tut ils telefonins en l'UE avair il medem attatg, il USB-C. 

Ils 24 doctober han ils stadis da l'UE acceptà la proposta da la cumissiun e dal parlament. Igl ha dentant durà 13 onns dapi che la cumissiun da l'UE ha dumandà dal producents da telefonins da sviluppar in standard per lura chargiaders dal 2009.

13 onns fin al standard

L'onn 2009 existevan 30 differents attatgs per telefonins, l'onn 2018 eran quai anc 3: il micro-USB tar telefonins pli vegls, il USB-C per telefonins dad Android e l'uschenumnà cabel lightning per products da la firma Apple sco per exempel il iPhone.


Las firmas n'èn betg vegnidas perina tge attatg duvrar. Surtut Apple è sa dustà cunter l'attatg USB. Lur arguments eran tecnics: Lur agen attatg lightning, saja pli fin ed er impermeabel per aua u pulvra. 


Critichers din dentant che la nova regla frainia svilups tecnologics sco per exempel novs cabels che chargian pli svelt.


Avantatgs per consuments e consumentas

Cun la nova regla, di l'UE, vegnia main cumplitgà da chargiar ils telefonins. Consuments e consumentas duain er cumprar main cabels. Els ed ellas duain numnadamain avair la pussaivladad da cumprar mintgapparat cun u senza chargiader. Quai saja er in pussaivladad da spargnar raps. Persunas en l'Uniun Europeica possian spargnar totalmain 250 milliuns euros ad onn. Ed era per l'ambient dettia avantatgs: I dat mintg'onn 11'000 tonnas rument electronic causa chargiaders e cabels che na vegnan betg duvrads.


En il focus dal reglament èn ils telefonins, ma quel vala er per tablets, mieurs, tastaturas, cameras ed uregliers ed autpledader a partir dal 2024. E dus onns pli tard – il 2026 – lura er per laptops. 


Er en Svizra

Er nus en Svizra duain survegnir be pli apparats cun il cabel USB-C. L'Uffizi federal da communicaziun ha ditg envers SRF ch'els hajan gia dapi l'onn 2016 la basa legala.

Dapli da «Il Digitip - il tip digital»

Scrollar a sanestra Scrollar a dretga