In cookie è nagut auter ch'ina pitschna datoteca da text che vegn arcunada durant mintga visita sin ina pagina d'internet sin il sistem local dal utilisader. Quai per arcunar infurmaziuns sur dal cumportament dal «user». Cookies gidan a paginas d'internet da megliurar l'experientscha da persunas en l'internet. Las paginas san entras quellas infurmaziuns uschia tge preferenzas ch'ina persuna ha, san uschia metter si reclamas adattadas per mintga persuna e pon arcunar pleds clavs per ch'ins na stoppia betg adina dar en quels danovamain.
Cookies rimnan infurmaziuns
Entras ils cookies pon las paginas dentant era rimnar infurmaziuns fitg persunalas da mintga persuna. Era pon memia blers cookies far che l'internet vegn pli plauns. Ord quest motiv èsi d'avantatg da stizzar mintgatant cookies nuschaivels.
«Lightbeam» po gidar
Tge cookies ch'èn nuschaivels e tgenins ch'èn nizzaivels pon ins eruir entras igl add-on «Lightbeam» ch'ins po chattar via Google. Era dattan tut ils navigaturs da web l'opziun da stizzar ils cookies manual via l'opziun installaziuns.