In dals gronds semperverds dal ballape è quel per il campiunadi mundial dal 1990. Giorgio Moroder ha fatg l'emprim ina versiun cun text englais e cun il titel «To be number one». Per la versiun taliana ha el dumandà Edorardo Bennato e Gianna Nannini, quella giada sin il zenit da lur carriera. Els fan il text talian, però Gianna Nannini ha pauc gust da questa chanzun commerciala.
A la fin sa partecipescha ella tuttina, er pervi da ses bab ch'è in grond fan da ballape e pervia da Bennato. Ils 8 da zercladur è l'avertura en il stadion «Giuseppe Meazza» a Milan e Gianna Nannini ed Edoardo Bennato chantan «Un'estate italiana». Ina milliarda persunas auda la chanzun a la televisiun e quella daventa in hit mundial.
Sin la plazza da ballape è il success main grond. l'Italia perda il mez final cunter l'Argentina da Diego Maradona e la Germania gudogna il final.
