Co sa depurtar en cas da brischament en in tunnel?

Far manevras n'è betg mo malsegir, ins perda era bler temp per ir en segirtad, di Roman Rüegg, pledader da medias da la polizia chantunala grischuna. Impurtant saja da parcar l'auto uschia lunsch davent sco pussaivel dal vehichel che brischa, en il meglier cas en ina plazza da pannas, uschiglio dal tuttafatg dretg dal vial. Betg emblidar ils sbrinzladers da panna, laschar la clav en la clav da contact, clamar la polizia ed ir or dal tunnel tras las galarias da segirtad.
En in tunnel cun pendenza èsi fitg impurtant dad ir engiu, perquai ch'il fim va adina ensi. Uschia evitesch'ins ina tissientada da fim.