Siglir tar il cuntegn

Header

MAD
cuntegn

The Beatles: «Strawberry Fields Forever»

Ils Beatles èn stads ina da las bands las pli impurtantas en l'istorgia da la musica da pop e rock. Els han gì success enorm ed èn er stads innovativs e revoluziunaris. Per blers cuntegn la 14avla single dals Beatles, cumparida ils 13 da favrer 1967, in dals tocs ils pli impurtants da l'istorgia da musica. «Strawberry Fields Forever», in toc cumponì da John Lennon, è ina producziun ch'era per quels onns enorm progressiva.

Ils Beatles na faschevan da quest temp nagins concerts e lavuravan perquai tant pli intensiv en il studio. In da lur experiments han els fatg cun instruments da l'India e cun il mellotron, in antecessur dal sintetisader che produciva curts tuns e ritmus cun agid da bindels sonors en l'intern.

L'emprima versiun da «Strawberry Fields Forever» è vegnida surlavurada numerusas giadas, cun metter ensemen differentas parts dal toc, cun «Overdubs», effects e cun midar direcziun e spertadad. Ozendi na fiss quai nagin problem, però la fin dals onns 60 è quai stà ina prestaziun extraordinaria, e respunsabel è stà en emprima lingia il producent George Martin. Cler che quai è daventà in grond success, però anc pli impurtant è il fatg che «Strawberry Fields Forever» è ina da las chanzuns che han marcà ina nova era en l'istorgia da musica.

Dapli da «Ina chanzun – in’istorgia»

Scrollar a sanestra Scrollar a dretga