Tscherts filters da UV vegnan suspectads da donnegiar ils curals. Uschia ha Hawai scumandà l'onn passà dus filters. Ils producents da crema da sulegl han reagì, stritgà ils dus filters e creà novs labels che duain demussar che la crema da sulegl n'è betg nuschaivla per la mar ed ils curals.
Quai saja in tric da reclama per vender dapli products, uschia Christian Surber, professer emerità ed expert per cremas da sulegl. Ils filters vegnian remplazzads cun auters filters, ch'ins n'enconuschi betg l'effect, ed ils labels sajan inventads.
