Per il studi che la fimra da segirtad da cyber «NordVPN» ha laschà far, han experts analisà mintgamai las 100 paginas las pli frequentadas da 25 pajais dal mund.
Sin plaz dus puncto trackers, suondan en Svizra las paginas da streaming, sin plaz trais e quatter las paginas da shopping e da medias socialas cun en media 22 e 20 trackers. Tuna da bler. Tuttina n'è quai cumpareglià cun auters pajas gnanc uschè bler. Ils pli blers trackers dovran paginas d'internet a Hongkong ed a Singapur cun en media 45 e 33 trackers. Quai ha cunzunt da far cun las leschas da la protecziun da datas ch'èn en l'Europa bler pli severas. Ils pli paucs trackers dovran en Svizra dal reminent paginas d'erotica, en media quatter trackers.
Pertge rimnan gist paginas da medias uschè bleras datas?
Quai ha tranter auter da far cun il fatg che las chasas da medias vulan savair, tge cha marscha bain e tge main. Per exempel, quant ditg ch'insatgi taidla las Gratulaziuns u guarda il video dal Telesguard.
E tar las medias privatas vegn anc la reclama latiers. Là funcziuneschan ils trackers uschia che sch'insatgi tschertga chamischas tar ina pagina da vestgadira e va silsuenter sin la pagina dal Blick, lura cumpara là era la reclama per chamischas, sch'ins ha dà il consentiment per ils trackers.
E betg d'emblidar: Sin ina pagina da novitads gira bler dapli che p. ex. sin ina pagina d'ina fatschenta ch'è plitost statica per sa preschentar, e nua ch'i cumpara tut tenor ina giada l'emna insatge.
