La «Stubete am See» è in dals inscunters impurtants da la musica populara che è mintg'onn la fin d'avust a Turitg. Quest eveniment survegn uss cumpagnia. Dals 15 als 17 d'october datti er a Segl in Engiadina ina Stubete am See.
La prima ediziun da l'onn passà ha stuì vegnir annullada l'ultim mument, però per quest atun pari che las premissas sajan bunas. Sin il program datti blera musica populara cun set furmaziuns che proponan in vast spectrum: da sauts tradiziunals ed innovativs fin tar tuns enconuschents e surprendents. Las furmaziuns vegnan da tut la Svizra e preschentan lur musica cun gronda variaziun e cun blers instruments, da l'orgelet a l'arpet e da l'ukulela a la tiba.
Il program da quests trais dis cuntegn concerts sin palcs en hotels ed en la chasa da scola Champsegl.
Las chapellas e furmaziuns: Appenzeller Echo, Rampass, Sulp, Topf, Evelyn e Christina Brunner, Neoländler, e la chapella Nogler.
