Gia il 1958 fa Edoardo Bennato musica. Cun 12 onns è el chantadur e ghitarrist dal «Trio Bennato», ch'el furma cun ses frars Eugenio e Giorgio. Il 1973 èsi daventà serius cun ses emprim disc. E trais onns pli tard suonda lura l'emprim grond success cun ses quart disc «La torre di Babele».
Ina chanzun fitg impressiunonta è «Venderò» cun il text da ses frar Eugenio – in text murdent e plain ironia. Er 50 onns pli tard è ella anc actuala, forsa pli actuala che mai. Bennato chanta dal bainstar senza cunfins, da talents che vegnan vendids als patruns dal progress, da las sconfittas che vegnan offertas a quels ch'han il basegn da sa sentir ferms. Però quels che n'han nagut vegnan sut las rodas.
Ina consolaziun, ina proclamaziun dal rebell Bennato, datti però. Tut ha ses pretsch, datti er chaussas ch'ins na po betg cumprar: la libertad!
