Il cumpliment dad oz vegn da Marina Schuoler da Sargans e va a ses geniturs Vendelina e Balzer Caviezel a Vella. Marina engrazia da cor per tut il bun ch'els fan adina per ella e sia famiglia. Cunzunt er per il temp ch'il figl da Marina, il pitschen Robin ha dastgà passentar l'emna passada tar tat e tatta a chaschun da la naschientscha da sia sora Amelie.
Ma era sch'els consistan mo d'in pèr pleds, vegnan cumpliments savens a la curta. RTR rimna e surdat quests cumpliments e gida uschia da dar enavos insatge a la glieud ch'ans embellescha mintga di la vita.
Audituras ed auditurs pon annunziar ad RTR lur cumpliment. Mintga gievgia decida la moderaziun tgenin che vegn resguardà. La moderatura registrescha lura in curt discurs cun la persuna che fa il cumpliment ed il venderdi telefonescha ella a la persuna che survegn il cumpliment.