En la app Weihnachtsplätzchen chattan ins fitg blers differents recepts per biscuits, pastinas u mams da Nadal. Sper tut ils recepts da biscuits tradiziunals chattan ins era bleras spezialitads or da differents pajais, uschia per exempel ina spezialitad svedaisa ch'ha num Drömmar u biscuits da chanella dal Mexico.
La app cuntegna dentant be adina ina pitschna fotografia dals biscuits ed il recept è descrit fitg cumpact. Descripziuns tar pussaivlas decoraziuns mancan en ils recepts. Uschia è la app plitost adattada per persunas che han gia ina tscherta experientscha da far biscuits. In auter minus da la app è ch'i dat ella be per android.
Recepts descrits pass per pass
Ina app che porscha dapli descripziuns è la app Sally. Quella porscha da tut ils recepts, en la rubrica dultschs, chattan ins dentant er divers recepts per biscuits. Il plus da quella app èn ils videos, nua ch'i vegn mussà pass per pass, co ch'ins fa ils biscuits. Ultra da quai pon ins squitschar ora il recept sco pdf e na sto betg adina avair avert il telefonin u il tablet ed i dat la app per android ed iOS.
Cunquai che la app è ina app generala cun recepts da cuschinar ston ins dentant in pau tschertgar ensemen ils recepts ch'èn lura propi adattads per biscuits da Nadal.
Glista da cumpra raffinada
La terza app cun il num Plätzchen backen cuntegna cun be 18 recepts surtut recepts da biscuits tradiziunals da Nadal. Il grond plus da quella app è però la glista da cumpra. Cun cliccar en ils recepts ch'ins ha planisà mintgamai sin la glista da cumpra vegnan agiuntads las ingredenzias ch'i dovra sin quella. Sch'ins actualisescha er gist la glista da reservas ch'ins ha a chasa, lura vegn er gist actualisada la glista da cumpra, uschia ch'ins ha l'ultim in minimum da rests.
Deplorablamain datti dentant er questa app be per android.
