Avant eveniments da sport impurtants datti savens chanzuns e melodias che duain far gust, per exempel sin campiunadis mundials da ballape. Er il 1978 esi stà uschia. Udo Jürgens, l'entertainer austriac, chanta ensemen cun la naziunala da la Germania «Buenos dias Argentina». El, sco adina, virtuos e suveran. Ils professiunals da ballape, Sepp Maier, Berti Vogts, Karl-Heinz Rummenigge, Hansi Müller e collegas han dapli fadia da tutgar ils tuns. La chanzun plascha però e riva en Germania, Austria e Svizra fin sin plaz 3 da las paradas da hits.
Quai che be paucs han remartgà quella giada e che blers n'han betg vuli savair: l'Argentina era ina dictatura brutala dal militar, cun arrestaziuns, tortura e blers ch'èn sparids. La squadra da chasa è vegnida campiun mundial. E la Germania? I dat ina blamascha, la vargugna da Cordoba. Els perdan cun 2:3 cunter l'Austria. La chanzunetta amiaivla da Udo Jürgens n'ha purtà nagina fortuna.
