Siglir tar il cuntegn

Header

audio
Conservar la racolta da l'iert
laschar ir. Durada: 4 minutas 23 Secundas.
cuntegn

Conservar la racolta da l'iert

Tgirar l'ilert vala la fadia per pudair mangiar l'atgna verdura. Era sin balcuns e terassas na flureschan da ditg betg pli mo ils gerais decorativs. Il trend dal «Urban gardening» ha ils davos onns piglià tiers. Ma co conservar la racolta per giudair l'entir onn vitamins da l'atgna cultivaziun?

Inqual enconuscha franc anc il tschaler da tatta e tat che deponivan tartuffels, maila u rischmelnas. Sche in tschaler è avant maun èsi da resguardar in pèr chaussas. Betg mintga sort è adattada per conservar en il tschaler. Per tartuffels, maila u tschagulas funcziuna questa varianta. Dentant duess quel esser frestg, stgir e bain ventilà.

Variantas fitg simplas
Quai è ina metoda simpla per conservar verduras u fritgs. Il gust ed era las substanzas nutritivas vegnan mantegnidas. Betg mintga sort è adattada per schelentar. Inqual sort sa senz'auter vegnir schelentà, autras ston vegnir bain preparadas. Fritgs e verduras cun ina gronda part aua na duessan betg vegnir schelentadas. Tar bleras sorts da verduras procura in curt bugl en l'aua cun sfradentar ch'ellas tegnan pli ditg en la schelentera. Simplamain lavar e schelentar san ins per exempel pumaraida, bulieus ed ervinas. Ervinas san era vegnir setgentadas. Setgentar è ina varianta fitg simpla. Pervia da l'aura e las temperaturas tar nus è setgentar a l'aria plitost difficil. Setgentar cun agid dad in apparat spezial sco per exempel il «Dörr-Ex» u il furnel è pli pauc ecologic.

Emplenir chaud
Quella moda da conservar veglia è tenor «A point» da SRF fitg en trend. Impurtant è da sulettamain prender fritgs sauns, en nagin cas dastgan sporas da miffa vegnir en il magiel che vegn sterilisà avant. Era durant emplenir è la igiena fitg impurtanta. Durant che la massa sa sfradenta en il magiel serrà datti in vacum che conserva uschia il cuntegn. Emplenir chaud na funcziuna betg mo cun fritgs; ina varianta fitg usitada per zuchetti e zitga è dultsch ed asch cun agiuntar aschieu e zutger. Era per buglia da maila u tomatas funcziuna questa varianta fitg bain. En l'internet chattan ins numerus tips, trics e recepts per tuttas differentas tecnicas da conservar.

Dapli da «Co e cum»

Scrollar a sanestra Scrollar a dretga