Autos èn lieus interessants per las fiergnas: In bun lieu per sa retrair, per part perfin anc bel chaud pervi dal motor. Sch'els èn là pon els dentant era far gronds donns cun mastgar e tschiccar sin cabels ed uders. Tenor l'Uniun professiunala svizra da l'automobil datti uschia mintg'onn donns da var 40 milliuns francs.
Per evitar donns saja impurtant da lavar l'auto, e surtut d'allontanar tut ils fastizs da las fiergnas. Tenor Gieri Arpagaus, ch'è garaschist a Cuira, stoppian ins dentant era pulir il motor. Quai va dentant be tar ina garascha.
Scurrentar per differents pretschs
Enconuschent èn er apparats che fan in tun fitg aut. Quel audan be ils animals (e persunas pli giuvnas). Quels tuns duessan scurrentar las fiergnas. In'autra pussaivladad è da laschar installar ina sort saiv electrica. Tar l'auto vegnan installadas plattas da fier, ch'èn sut tensiun. Sch'in animal la tutga, survegn el ina piztgada e scappa.
La meglra opziun saja vinavant da metter l'auto en garascha. Ma adatg: Ad ina fiergna basta ina fora uschè pitschna sco in ov per entrar en il local.