Avant 50 onns arriva Alberto Giacometti a Cuira per ina controlla a l'ospital chantunal. El spera da turnar bainbaud a Paris per lavurar vinavant, a la tschertga instancabla da la figura perfetga. Dentant na banduna el betg pli l'ospital e mora nunspetgadamain il 11 da schaner 1966.
La Marella sa metta cun dus amis dad Alberto Giacometti als fastizs da sia vita. Il cardiolog Reto Ratti ha passentà sco giuven student a Paris bler temp cun ils dus frars Alberto e Diego. Qua è sa stabilì in'amicizia che ha durà tut lur vita. Ina relaziun amicabla aveva er il famus galarist e collectader Eberhard W. Kornfeld cun Giacometti. Savens era el giast tar Kornfeld a Berna. L'ultima giada la fin november 1965 cur che Giacometti è vegnì undrà cun il dr. honoris causa da l'Universitad da Berna. Cur che Kornfeld ha manà el sin la staziun eran ils ultims pleds da ses ami: «A bientôt a Paris!»
Redacziun: Claudia Knapp
