Cla Nett viva a Basilea, ha però ragischs a Ramosch en Engiadina ed è stà il 1975 confundatur da la «Lazy Poker Blues Band». Ed el è in piunier dal blues en Svizra. E questa musica al fascinescha anc adina.
Il giurist da 61 onns ha dà sur 1'000 concerts ed è stà notgs a la lunga sin ils palcs da bars e clubs. Dentant n'ha el anc betg avunda. Ensemen cun Kurt Bislin, er el in blueser da num e da pum, ha el in nov project, la band «The Second Cousins». Sin lur emprim disc «Bloody Tears» chanta el «I Aint Got Enough». Quai è ina da sias cumposiziuns, genuina e gruglia en il stil dal Chicago Blues.
Cla Nett e Kurt Bislin èn musicists da blues cun corp ed orma, però i dat anc in'autra istorgia. Avant in pèr onns han els scuvert che lur tats eran frars, els èn damai cusrins da segund grad, «Second cousins».
