Dapi passa in onn sa preparan ils acturs da lUniun da teater da Domat per la premiera dal toc «Der schwarze Hecht». L'emprima versiun da quest toc aveva il cumponist svizzer Paul Burkhard scrit l'onn 1939. La versiun che vegn preschentada a Domat è da l'onn 1976. Il toc è oravant tut daventà famus per sias chanzuns enconuschentas sco «Oh mein Papa» ubain «Ich sags gern durch die Blume».
Quest toc da teater è gia ina giada vegnì represchentà a Domat. L'onn 1983 avevan ils da Domat inaugurà la sala polivalenta Tircal cun quest toc. Las sfidas dal toc èn però magari las medemas sco lezza giada. Oravant tut la musica fa fadia als acturs. Discurrer en il ritmus e chantar è per pli u main tut ils acturs fitg pretensius. Ed era per ils musicists, dus pianists, èn las notas fitg pretensiusas.
Tenor la cassiera da l'Uniun da teater, Catia Niedermann, è er il budget per questa producziun in toc pli aut sco uschiglio. Per cumpensar ils custs per costums, per ils pianists e per il toc da teater sez è l'uniun dependenta d'insaquants sponsurs e natiralmain era da bler public. Numerus bigliets sajan gia vendids, il project saja sin buna via.
L'acziun dal toc
Pel 60avel anniversari dal bab preparan la mamma, la figlia e l'emploiada da chasa ina gronda festa. Ils trais barbas cun lur dunnas èn vegnids envidads per il past festiv, in grond glischun. Cur che tuts èn vi da mangiar, cumpara nunspetgadamain il quart barba cun sia dunna. Quel è directur d'in circus e vala era tras quai sco nursa naira en la famiglia. La figlia dal giubilar è però fieu e flomma per la lavur dal directur da circus. Ed er ils auters barbas èn fitg fascinads, però pli fitg da la bella dunna da lur frar che dad lez. Las autras dunnas n'èn insumma betg intgantadas dal directur e sia dunna. La festa d'anniversari para da vegnir in drama da schigliusia turbulent.
