I dat chanzuns popularas che fan carriera, che daventan semperverds da la musica da pop e rock. In dals gronds classichers da quel gener è ina chanzun che deriva dal sid dals Stadis Unids, che raquinta d'ina chasa cun num dubius a New Orleans. Là han gia blers fatg naufragi ed èn vegnids ruinads. «The House of the Rising Sun» è ina chanzun tradiziunala e mintgatant ha ella er num «Rising Sun Blues».
I deva gia registraziuns dals onns 30, ramassadas dal perscrutader da cultura e musica Alan Lomax, ina da Woody Guthrie ed er ina da Joan Baez. Pero pir il 1964 è ella vegnida enconuschenta sin tut il mund. E responsabla è stada ina gruppa da rock britanica, ils «Animals» cun Eric Burdon, Alan Price, Hilton Valentine, Chas Chandler e John Steel.
Els eran sin turnea ed avevan udì il toc ina saira en ina bar a Newcastle – ed han gì l'impressiun che questa melodia fiss in bel cuntrast per lur program da concerts. Lur versiun è lura daventada la pli renumada ed è anc oz lur semperverd etern.