Schameala

In'auditura – la biadia da l'enconuschent Plasch Barandun, barmier da Veulden – ha dumandà la derivanza dad in toponim si Lai che tuna sco Schamuela. La Val Schameala deriva dal pled latin «gemini» che è daventà schumellins en rumantsch, en ils idioms schumials/schumblers/schemblins/dschimels u en sutsilvan schameals. En la Val Bever datti il Piz Dschimels, a Ftan la Peidra Schmella ed a Seewis sa numna ina chamona Schamällahüttli. Il Giümellin datti a Poschiavo ed a Brusio. Pertge che la Val Schameala sa cloma uschia savessan forsa respunder Castor e Pollux che glischan en l'ensaina dals schumellins.