Il musicist american Willy Deville enconuschan paucs, quai è plitost ina chaussa per fans da blues, americana e rock cun tuns latins. Sco solist ed er cun sia band «Mink DeVille» ha el però procurà per in per bels semperverds. El è naschì il 1950 e mort il 2009, cun be 58 onns, suenter ina vita intensiva a New York e New Orleans, cun bleras drogas. Però sco musicist è el stà in dals creativs, sco solist ubain cun sia band «Mink DeVille».
Tranter ses pli bels tocs èn «Italian Shoes», «Demasiado Corazon» e surtut «Spanish Stroll», in toc da rock cun tempra latina ed in text englais e spagnol. En ils Stadis Unids èn questa chanzun ed er bleras da sias autras restadas in tip secret. En l'Europa ha el però chattà blers fans ed ha fatg cun success bleras turneas.
