Aint ils tapigns

Cura ch'il producent da RTR m'ha tramess la dumonda da las duas audituras surmiranas Babigna e Daniela, ha el agiunt a la fin: «Eu sun persvas cha tü gniast a tapin». Quai è l'expressiun en ladin per vegnir a frida cun insatge, en ladin din ins era anc «gnir a bröch». Ditg e fatg, ma per dir la vardad è quai stà ina sfida difficila! Il dicziunari dals Pallioppis da l'onn 1895 ha mussà la via cun inditgar il pled talian «tapino» che stat per «pauper, miserabel». Esser en ils tapins vul pia dir, esser en ina situaziun nauscha. En in text dal 17avel tschientaner chattain nus gia l'expressiun, cur che la protagonista di, ch'ella preferescha da murir «...avaunt co gnir à quist tapin!»