Siglir tar il cuntegn

Header

audio
L'actur Klaus Kinski ed il reschissur Werner Herzog en ina scena dal film documentar' Mein liebster Feind'
keystone
laschar ir. Durada: 3 minutas 16 Secundas.
cuntegn

Klaus Kinski

Oz avess l'actur Klaus Kinski festivà ses 90avel di da naschientscha. Per ils ins è el in genie sin la taila da kino, per ils auters è el simplamain in psicopat.

Klaus Kinski, naschì avant 90 onns a Zoppot, creschì si a Berlin e morts l'onn 1991 en la vegliadetgna da 65 onns en California. Klaus Kinski è vegnì festivà sco actur - sias rollas da parada èn quellas, nua ch'el gioga psicopats, ballurds. Cunzunt ses films ensemen cun Werner Herzog èn vegnids festivads sco genials - per exempel il film "Nosferatu", "Der Zorn Gottes" ni er "Fitzcarraldo". Ed er sin parchet internaziunal ha Kinski gì success cun giugar rollas en films da Edgar Wallace ubain cun rollas en westerns talians.

Tar Kinski è dentant adina er stà la dumonda: Quant è simplamain giugà, e quant è el psicopatics? Er sco persuna privata saja el numnadamain stà tut auter che simpel. El pudaiva vegnir en nunditga ravgia, grir ed attatgar. Ed il mènder: Las scuvertas da sias figlias l'onn 2013. Kinski haja maluvrà la figlia Pola sexualmain e quai davent da 5 enfin ch'ella haja gì 19 onns. Kinski era gia mort e n'ha betg pudì sa defender. Dentant sajan las descripziuns da la figlia Pola vegnidas valetadas sco fitg crediblas. Ed er autras dunnas han confirmà mulestas entras Kinski.

Che Kinski è vegnì festivà sco genie saja be fitg grev da chapir per la figlia Pola. Ella na vesia nagina differenza tranter la rolla dal psicopat ubain ses bab. En in'intervista di ella: "Exact uschia sco el era en sias rollas, era el er a chasa."

Dapli da «Il chavazzin dal di»

Scrollar a sanestra Scrollar a dretga